ఎవరో ఒకరు.. ఎపుడో అపుడు...నడవరా ముందుగా.... అంకురం (1992)
ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
మొదటి వాడు ఎప్పుడూ ఒక్కడే మరి..
మొదటి అడుగు ఎప్పుడూ ఒంటరే మరి..
వెనుక వచ్చువాళ్ళకు బాట అయినది..! [[ఎవరో ఒకరు]]
కదలరు ఎవ్వరూ వేకువ వచ్చినా..
అనుకొని కోడి కూత నిదరపోదుగా ..
జగతికి మేలుకొలుపు మానుకోదుగా ..
మొదటి చినుకు సూటికా దూకి రానిదే..
మబ్బు కొంగు చాటుగా ఒదిగి దాగితే ..
వాన ధార రాదుగా నేల దారికి..
ప్రాణమంటూ లేదుగా బ్రతకటానికి .. [[ఎవరో ఒకరు]]
చెదరక పోదుగా చిక్కని చీకటి..
మిణుగురు రెక్క చాటు చిన్ని కాంతికి ..
దానికి లెక్క లేదు కాళరాతిరి..
పెదవి ప్రమిద నిలపనీ నవ్వు జ్యోతిని..
రెప్ప వెనక ఆపనీ కంటి నీటిని..
సాగలేక ఆగితే దారి తరుగునా..?
జాలి చూపి తీరమే దరికి చేరునా..? [[ఎవరో ఒకరు]]
యుగములు సాగినా నింగిని తాకక..
ఎగసిన అలల ఆశ అలసిపోదుగా..
ఓటమి ఒప్పుకుంటూ ఆగిపోదుగా..
ఎంత వేడి ఎండతో ఒళ్ళు మండితే..
అంత వాడి ఆవిరై వెళ్లి చేరదా..?
అంత గొప్ప సూర్యుడు కళ్లు మూయడా..?
నల్ల మబ్బు కమ్మితే చల్లబారడా..? [[ఎవరో ఒకరు]]
చిత్రం : అంకురం (1992)
సంగీతం : హంసలేఖ
రచన : సిరివెన్నెల సీతారామ శాస్త్రి
గానం : చిత్ర , ఎస్.పి.బాల సుబ్రహ్మణ్యం
***********************************
No comments:
Post a Comment