భగవదర్చన

అర్చన అంటే సమర్పించడం. మనలను ఏవి ఆకర్షిస్తాయో వాటిని భగవంతునికి సమర్పించడమే దేవతార్చన. 

మనలోని శబ్దస్పర్శరసరూపగంధ జ్ఞానమును కలుగజేయు విషయములను భగవంతుని ముందు సమర్పించాలి. 

ఇందుకు ప్రతీకయే భగవంతునికి  మనం చేసే పూజ . 

శబ్దం: భగవంతునికి హారతులిస్తూ గంట మ్రోగిస్తాం. మనలోని శబ్ద జ్ఞానాన్ని దేవుని పరం చేయాలి. 


స్పర్శ: కోమలమైన, అందమైన పూలతో దేవుని పూజ చేస్తాం. అంటే మనం  కోరుకునే స్పర్శా సౌఖ్యాన్ని దేవునికి సమర్పించాలి. 


రసం: ఇక ప్రభువుకి నైవేద్యం సమర్పిస్తాం. ఇది రసము. అంటే మనలోని జిహ్వ చాంచల్యాన్ని భగవంతుని సన్నిధిలో వదిలేయాలి. 

రూపం: దేవుని ముందు దీప ప్రజ్వలనం చేస్తాం. ఇది రూపమునకు సంకేతం. రూపలావణ్యములకు ఆకర్షింపబడుమన దృష్టి జ్యోతిని భగవంతుని పరం చేయాలి. 


గంధం: పూజ చేసేటప్పుడు ధూపం సమర్పిస్తాం. అంటే మనలోని విషయ వాసనల దూపాన్ని ప్రభువుకు సమర్పించాలి. 

వీటన్నింటితో పాటు మనలోని మనోగత, బుద్ధిగత చాంచల్యాన్ని కూడా భగవంతునికి నివేదనము చేయాలి. 

అప్పుడే మన అర్చన పరిపూర్ణమవుతుంది.